Barónar, Uppsalabrauð og fleira gott úr eftirstríðsáraeldhúsinu

Staðlað

Kjöt, fiskur, súpur, grautar, bakkelsi, ábætisréttir og annað gott úr handskrifuðum kokkabókum systranna Sigurlaugar og Guðbjargar Sveinsdætra frá Tjörn á Skaga. Þær voru Kvennaskólapíur á Blönduósi á stríðsárunum og uppskriftirnar þeirra fengu nýtt líf í bókinni Uppskriftir stríðsáranna eftir Önnu Dóru Antonsdóttur og Kristrúnu Guðmundsdóttur sem Espólín forlag var að gefa út.

Sigurlaug er betur þekkt á Dalvík sem Lauga í Lundi. Dóttir hennar, Anna Dóra, og Kristrún fengu þá hugmynd að endurútgefa valdar uppskriftir úr kokkabókunum og flétta saman við eigin hugleiðingar um dægurmál eða lífið og tilveruna.

Fín hugmynd í skemmtilegri útfærslu. Úr varð ljómandi laglegur prentgripur sem kynntur var við athöfn í kvöld í Gunnarshúsi Rithöfundasambands Íslands við Dyngjuveg.

Útgefendur höfðu að sjálfsögðu bakað Uppsalabrauð og Baróna úr nýju bókinni með kaffinu og fyrir þó nokkra gesti voru þetta fyrstu kynni af smákökum fyrir jólin í ár. Og það góð kynni.

Höfundarnir kynntu bókina og lásu upp úr henni. Þá fékk Ísold Ylfa Teitsdóttir, langömmubarn Laugu í Lundi, afhenta bók og heilræði í nestið frá Önnu Dóru, frænku sinni.

Á milli atriða spiluðu Suðurnesjastrákarnir Alexander og Sigurður djass á rafmagnsgítara og gerðu það alveg glimrandi vel.

Upprunalegar kokkabækur systranna frá Tjörn voru til sýnis á staðnum, snjáðar og slitnar eftir mikla notkun um dagana. Kápan á nýju bókinni er eftirprentun kápu kokkabókar Sigurlaugar. Býsna glúrin hugmynd hjá Espólín og skapar útlit í anda bókartitilsins.

Hér við eldhúsborð í Fossvogi er nú horft til síldarsalats og síldarauga sem fyrsta tilraunaverkefnis. Takist það bærilega (og eggjarauðan (augað) springur ekki) er aldrei að vita nema tekið verði þróunarstökk og lagt næst í hérabróður. Þá værum vér komin í kjötdeild kokkamennsku eftirstríðsáranna með sósu og brúnuðum kartöflum.

Lukkist hérinn blasa næst við danskt buff og hænsnasteik.

Kokkabókin gæti þannig orðið spennusaga í framkvæmd. Hver hefði nú trúað því að slíkt geti gerst?

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google photo

You are commenting using your Google account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s