Ingibjörg frá Tjörn áritar Fjallkonuna sína í útgáfuteitinu í dag.

Heimilislegt og býsna svarfdælskt andrúmsloft í bókabúð Máls & menningar í miðbæ Reykjavíkur síðdegis þegar Ingibjörg Hjartardóttir – Imba á Tjörn og Hugleikur sonur hennar Dagsson kynntu afurðir sínar á bókaverðtíð ársins.

Bækurnar sæta að sjálfsögðu tíðindum en ekki síður að mæðgin skuli efna til sameiginlegs útgáfuteitis!

Bók Hugleiks er sú fjórða í röðinni í myndasöguflokknum Endir. Hann er höfundur sögunnar og fjallar um nýjan heimsendi í öllum tilvikum í samvinnu við nýjan og nýjan teiknara. Pétur Antonsson teiknar sögu einstæðrar móður í nýju bókinni og gerir það af stakri snilld í hugleiksum anda.

Æskuvinkonurnar Imba frá Tjörn og Steinunn frá Másstöðum í teitininu í bókabúð Máls og menningar.

Imba sendir hér frá sér dramatíska skáldsögu með sterku sögulegu ívafi og laglega fléttuðu endatafli.

Heimskonan Ríkey kemur heim á æskustöðvarnar til að fylgja móður sinni til grafar í kirkjugarði þar sem faðir hennar hafði hvílt í hálfa öld eftir að hafa farist í snjóflóði. Ríkey var tíu ára þegar hún missti pabba sinn, sem jafnframt var í fararbroddi bænda í baráttu gegn virkjunarframkvæmdum í dalnum.

Augljóst er að höfundur sækir hugmyndir um drifkraftinn í sögunni að miklu leyti í atburði sem um hefur verið fjallað talsvert hér á þessu vettvangi undanfarið, snjóflóðaslysin í Skíðadal 1955. Imba sagði frá því í viðtali í Morgunblaðinu síðastliðinn sunnudag, 15. nóvember, að hugmyndin hefði kviknað þegar hún var tólf ára í Húsabakkaskóla. Með henni í herbergi í heimavistinni voru tvíburasystir Imbu, Sigrún – Didda á Tjörn og Steinunn Aldís Helgadóttir. Þær eru jafnaldrar og fóru eitt kvöldið að spjalla undir svefninn um föðurmissi Steinunnar í snjóflóði þegar hún var þriggja ára.

Í Fjallkonunni býr Ríkey á Völlum og á vinkonur í Kirkjubæ, tvíbura. Imba undirstrikar tenginguna með því að tileinka Steinunni frá Másstöðum bókina.

• Fjallkonan er fjórða skáldsaga Imbu á Tjörn og útgáfurétturinn hefur þegar verið seldur til Þýskalands, þar sem bókin kemur út fljótlega á nýju ári.

Hugleikur Dagsson, Pétur Antonsson og Ingibjörg Hjartardóttir með bækurnar sínar.