Þess verður minnst á þriðjudaginn kemur, 9. apríl, að rétt 50 ár eru liðin frá því að ellefu sjómenn fórust í fárviðri við Norðurland, þar af sjö Dalvíkingar í blóma lífsins. Þetta gerðist í dymbilvikunni 1963. Dalvíkingarnir voru af vélbátunum Hafþóri og Val.

Sunnandalvíkingurinn Haukur Sigvalda er frumkvöðull og helsti drifkraftur fjölþættrar minningarathafnar á Dalvík og Eyjafirði.

Dagskráin 9. apríl hefur tekið á sig eftirfarandi mynd:

 Kl. 13:00

• Trébátar leggja úr höfn á Dalvík og Húsavík áleiðis  að mynni Eyjafjarðar norður af Gjögrum yst á Flateyjarskagarskaga. Þar verður blómakransi varpað í hafið í minningu þeirra er fórust í páskahretinu mikla 1963.
• Séra Magnús G. Gunnarsson, sóknarprestur á Dalvík, flytur minningarorð.
• Gert er ráð fyrir því að komið verði til baka til Dalvíkur um kl. 15:30.
• Þeir sem áhuga hafa á því að slást í för eru velkomnir svo lengi sem næg skipsrúm bjóðast.

Kl. 16:00

• Bautasteinn afhjúpaður við athöfn á norðurgarði Dalvíkurhafnar.
• Ávarp: Svanfríður Jónasdóttir, sveitarstjóri Dalvíkurbyggðar.

Kl. 17:00

• Minningarathöfn í Dalvíkurkirkju:
  • Söngur: Karlakór Dalvíkur og Kór Dalvíkurkirkju.
  • Ávarp: Haukur Sigvaldason, frumkvöðull að minningarathöfn og bautasteini.
  • Ávarp: séra Magnús G. Gunnarsson.

Steinninn sem reistur verður sem minnisvarði á Dalvík var sérvalinn þar í hafnargarðinum haustið 2012 og fluttur suður í Kópavog til listrænnar meðhöndlunar og merkingar. Jón Adolf Steinólfsson, tréskurðarmeistari og listamaður, klappaði lágmynd í steininn.